أخبار عاجلة

[بحث] مغامرات مخبوطة في بلاد بـرا – ملخصات وتقارير

ازيكو يا حلوين
الحقيقة كنت بقرا في الاجندة بتاعتي لقيت اني كاتبة فيها ذكريات رحلتي لايطاليا من 5 سنين .. وافتكرت تفاصيلها المضحكة .. مع اني كنت نسيتها خالص ..
كان ياما كان في سالف العصر والبتنجان
عم ليا سافر لايطاليا وهو عندو 15 سنة .. وفضل عايش هناك ومارجعش تاني .. الا كم مرة في اجازات .. بس المرة دي وهو راجع اصر ياخدني يفسحني معاه .. وانا طبعا ما صدقت .. وخدت اجازة من شغلي وسافرت ..
وسط غيظ الاصدقاء و كأني ( طالعة القمر ) ..
وفرحة اخواتي اني همثلهم في اوروبا
بس ما نفعش انا وعمي نسافر في يوم واحد .. سافر قبلي وانا لحقته بعدها باسبوع
_____

في الطائرة :

طلعت سلم الطيارة وانا حاملة شنطتي الصغيرة و وروح المغامرة عمالة تطرطش ..
دخلت الطيارة .. الطرطشة بتاعت روح المغامرة خفت شوية ..
كلها اجانب ! .. انا العربية الوحيدة .. وكل النظرات عليه .. واضح اني مسلمة من الحجاب .. وهم كلهم بالشورت ! ستات ورجالة .. يلا يلا مش مشكلة ..

قعدت على الكرسي بتاعي ..
روح المغامرة توفت الى رحمة الله ...

شاب وشابة ( أسدكاء) قاعدين قدامي .. وواخدين راحتهم خالص ..

( يا نهار اسود !!!! ايه اللي بيحصل ده !!! اروح فين طيب ! انط من الطيارة !! ما ينفعش مقفولة !!......... ايه اللي كان جابني بس !)
_____

وصلنا الحمدلله بعد 4 ساعات .. اووووووووف اخيراً .. احمدك ياااارب
خرجت من المطار .. ببص يمين شمال ...

( عمي فين ! قالي هيستناني ماجاش ليه ! .. فينا من الحركات دي ! والناس هناك مش بتتكلم عربي ولا انجليزي ! .. وانا ماعرفش ايطالي !! يادي الحوسة !!!! وشي بقى احمر .. وخلاص هعيط .............. انا عايزة ماما .. خدوني لماما )

صوت من بعيد ..
مخبوطة .. يا مخبووووطة .....

( ايه ده مين اللي بينده .. مين الراجل ده !! ............... ده عمي ... ايه اللي هو لابسه ده !!!!!
طقية وتي شيرت منزوع الاكمام .. وشورت ! .. ايه ياعمو اومال لو كنت رفيع كنت هتلبس ايه !! ... ومعاه وحدة ......... مين دي ؟؟)

لقيتها بتجري ونطت عليه وباستني .. ( اخلا وسخلا اخلا وسخلا ) ..
بصيتلها زي الهبلة : هه .. اهلا اهلا ..

(عمي بيقولي دي بنت عمك .. .... بنت عمي ؟؟!!! شكلها اتغير اوي ! وايه اللي هي لابساه ده !!! وعمي ساكتلها ؟!! .... التاااار ولا العاااار..!!!!!! )

ركبنا العربية ..
عمي : اربطي الحزام يا مخبوطة .. هنا مفيش تهاون في ربط الحزام ..
انا : حاضر يا عمو
عمي : انتي مش عند العرب عشان تقعدي في العربية من غير ما تربطي الحزام ..!
( بدأت التفرقة العنصرية تظهر على السطح .. )

انا مع لوية بوز : ربطته يا عمو من اول ما قلتلي ...
بنت عمي : بتخبو تروخو الديسكو ..؟؟
انا : ايه ؟!
عمي : بتقولك بتحبي تروحي الديسكو ؟؟
انا : لا لا .. انا ما بروحش الاماكن دي !
بنت عمي : لا اخنا موش إشرب خمرة هناك !!!
انا : لا العفو هو انا قلت كده .. بس انا ما بحبش الديسكو ..!
بصتلي بصة استغراب وكأنها بتقولي ( ايه التخلف ده ! )

( لا واضح انها رحلة سعيدة من اولها )!!
_____

وصلنا البيت ... ياااا مسهل

عمي : تعالوا يا ولاد سلموا على بنت عمكم ....
مرات عمي ( ايطالية ) : اوووه تخياتي تخياتي ..

ابن عمي ببرود : اخلا وسخلا .. كيف انتا
( طويل وعريض .. هاري نفسه برونزاج .. لابس شورت .. وبس !
لا وعايز يسلم عليا زي ما الستات عندنا بيسلموا على بعض ..!!!!! )

انا : ايه يا اخ رايح فين ؟؟؟
عمي : ها ها ها ... عادي ماهو زي اخوكي الصغير
انا : لا مش اخويا !
ابن عمي : " بيرطن بالايطالي "
انا : هو بيقول ايه ؟
عمي : بيقول ان لو صحابو شافوكي هيغيروا منه ..
انا : صحابه ! .. ده من دور عيالي !
عمي : لا عادي هنا ممكن الولد يصاحب وحدة اكبر منه بخمستاشر سنة ..
انا : ماشاء الله ما شاء الله ..
( ده لو عندنا جه عريس واكتشف ان العروسة اكبر منه بشهرين يروح وما يرجعش ! )
_____
الغدا ...
انا : ايه احنا هناكل هنا .... ؟؟؟
عمي : ايوة ... انتي فاكرة هنا زي العرب الناس هتبصلك في اللقمة ؟؟!!

( الغدا في الجنينة .. سور الجنينة طوله نص متر .. والجيران جمبنا .. وعادي كل واحد واخد راحته في الجونينة بتاعته .. والناس في الشارع شايفانا !!!)

مرات عمي : لازم تخلس التبأ كلو موش تخلي خاجة .. اوكي ؟؟
بصيت للطبق باستغراب : هـهـهـه حاضر تسلم ايديكي

( اخلص ايه الطبق فاضي اساسا .. صباع كفتة عندو انيميا .. ومعلقة رز يتيمة جمبه .. وبتقولي خلصي الطبق ! )

_____
تاني يوم ...

بعد الغدا بتلات ساعات .. انا جعانة اوي .. الناس دي ازاي عايشة بالعينات اللي بياكلوها !
نزلت المطبخ .. اعمل ( عينة سندوتش جبنة ) اصل مفيش عيش في البيت .. كل شهر بيشتروا رغيفين .. !
مرات عمي : ليه انت تاكل استنى الئشا انتا موش ئايز تتئشا ؟؟
( هو انا لو كلت دلوقتي العينة اللي في ايدي دي يعني خلاص مش هتعشى ؟! )
انا : لا عادي هغصب على نفسي واتعشى عشان خاطركوا !
مرات عمي : لا لا كدة موش انفأ ( ينفع ) .. انتا بعدين تسير تخين كتير كتير .. موش كويس لا لا ..

انا : ايوة طبعا طبعا .. احم .. بس حسيت اني دايخة شوية عشان كده اضطريت اغصب على نفسي واكل السندوتش !!

( هو انا ايه اللي كان جابني بس !)

في العشا :
مرات عمي : انتا ئايز تتئشى ؟
انا : لا بس هقعد معاكو مجاملة .. اصل سندوتش الجبنة ده مش هاكل بعده من هنا لاسبوع ..
وبنت عمي تاكل في الهمبرجر : كولي مخبوطة .. سوية بس ..
وانا عيني هتطلع على الهمبرجراية اللي في ايدها : لا لا .. بجد مش قادرة من ساعتين كلت مفيش مكان فاضي للاكل .. احم احم

( اثناء العشا جه راجل صاحب عمي .. سلم عليهم وسلموا عليه .. وقعد جمبنا في الصالون لحد ما الاسرة المصونة تخلص اكل ! )
انا : ايه يا عمو هو الراجل مش هيتفضل ؟؟
عمي : يتفضل فين ؟
انا : يتعشا معانا ..
عمي : لا هنا اللي بييجي من غير معاد وقت الاكل بيقعد ما بياكلش لأننا اكيد مش عاملين حسابه
انا : اه
( وساعتها نفسي اتسدت بجد .. منظر وحش اوي .. !!! )
_____
تالت يوم ..
مرات عمي : يلا مخبوطة نروح السوء
انا : اووووكي .. اخيرا هخرج ...
وانا ماشية مع مرات عمي في المول .. حسيت ان كل الناس بتبصلي .. يمكن عشان محجبة

انا : هم الناس هنا مش متعودين يشوفوا مسلمين كتير ؟؟
مرات عمي : لا موش كل ناس .. في ناس مش ئارفين انتا ليه لابس ئوماش ( قماش ) كتير كتير في السيف ( الصيف ) .. فخمتو ؟
انا : اه فخمتو يا خواجة ..

( مجنونة في نظرهم بقى .. لابسة 6 متر قماش و مغطية دماغي ولابسة كم وطويل والدنيا حر .. بينما هم مش مكلفين نفسهم غير شبر قماش واحد .. معذورين ماهي الدنيا صيف بقى .. ! )
انا : في ستات بتبصلي بخوف .. خصوصا العواجيز ..
مرات عمي : بيخافوا من مسلم عشان هم افتكرو انتا ارهابي ..
( يانهار زي بعضه !!!!!!!!!!!! )
انا : بصراحة ريقي نشف .. عايزة اشرب من تلاجة الكولا اللي هناك دي ممكن نروحلها ؟
مرات عمي : اوكي .. معاك 2 يورو ؟؟
انا : ايوة .. اتفضلي ..
(ايه ده ! ... دي خدت مني تمن القزازة ..! مش انا ضيفة هنا !... دي كلها قزازة كولا !!! )
_____

يوم في البحر ...
مرات عمي : انت روه بهر لابس ايشارب !! موش ينفأ !
انا : لا عادي ايه يعني ..
مرات عمي : خلاس انتا هور ( حر )
( ورحت وياااااريتني ما رحت ... إيه الحياة اللي عايشينها الأجانب دي؟!!!! مش عارفة اودي وشي فين ...! يادي الاحراج ! .... طب على الاقل البسوا مايوه .. ده انا اكتشفت عندهم ان المايوه ده سترة ! )

هو انا ايه اللي كان جابني بس !!!

عمي : عارفة لو عديتي البحر توصلي لفين ؟
انا : فين ؟
قالي : فلسطين .. ماهي قدامنا على الخريطة .. تحبي تركبي مركب وتروحي غزة من هنا ؟؟ ها ها ها

( ياريت .. حضرتك بتقول فيها ! .. لما كنت في غزة واقف على البلاكونة واتأمل البحر .. احس ان مالوش نهاية .. واقول ياترى في ايه ورا البحر .. واتخيل ان مفيش وراه غير الشمس .. بس دلوقتي عرفت في ايه ورا البحر .. بلاوي زرقة )

_____
بعد ايام .....

مرات عمي : يلا مخبوطة نروخ سوء ..
انا : انا زهئتو من سوء .. مفيش مكان تاني نروخو غير سوء !
( بقيت اتكلم عربي مكسر من غير ما احس ! )

على الغدا ...
عمي : ايه يا مخبوطة انتي طول الوقت قاعدة على النت ! حتى ما بقتيش تخرجي ...
انا : حفظت الشارع بتاع السوق يا عمو .. وبعدين هو انا لاقية حد بيتكلم عربي غير في النت !

( انا اتعقدت من الخروج بجد .. الناس بتتصرف في الشوارع وكأنهم في بيتهم وانا ما بحبش اشوف المناظر دي في الافلام ..... اروح اشوفها قدامي !!!! )

انا : ممكن ياعمو تترجملي بتقولوا ايه .. كل يوم قاعدة وسطيكوا مش فاهمة حاجة .. انت ما علمتش اولادك يتكلموا عربي ليه !!
عمي : لسة هقعد اعلمهم عربي .. انا علمت مامتهم بالعافية
انا : طب ترجملي واشركوني معاكوا في الكلام !
عمي : يا ستي ما تاخديش في بالك .. تاخدي حتة فيليه فراخ تاني ؟
انا : ايوة اخد ..
( خلاص بقى ما بقتش اتكسف )
_____
حكاية الملوخية
انا : ايه يا مرات عمي انتي تعرفي تعملي ملوخية ؟؟!!
مرات عمي : ايوة انا ائمل ميلوخيا كويس اهسن من انتا ...
( احمدك يارب هاكل حاجة اعرفها )
( دخلت المطبخ في ريحة غريبة اوي ..!! في حلة على النار مقفول عليها والغطا بتاعها شفاف .. وفي جواها حاجة سودة بتغلي .. ايه البتاع اللي جوة ده ؟؟ وانا مالي يمكن حاجة معرفهاش)
وساعة واقفين في المطبخ نرغي انا و مرات عمي .. وبعدين قالتلي : اتفي النار اللي فيها ميلوخية يا مخبوطة ..
( ايه ؟! هو الطبيخ اللي له ساعة على النار العالية دي ومقفول عليه وبيغلي .. ملوخية ؟؟؟! اتاري لونها بقى اسود !!!)
واحنا بنتغدا مش قادرة اكل منها ... طعمها وحش اوي ومضطرة اجامل .. وكلهم بياكلوا وبيقولوا مممم لذيذة ... !
وعمي يقول لمراته : المرة دي الملوخية طلعت احلى من كل مرة .....!!!!!!!!!!!!!
( احلى من كل مرة؟؟ ....!! هي دي ملوخية ؟... دي فشوخية !! ) _____
وعدى عليا شهر مش عارفة عدى ازاي ...

يوم السفر ..
صاحية الصبح لأول مرة مبسوطة مش مصدقة نفسي اني راجعة .... وكلهم بيسلموا عليا وزعلانين !
وانا الوحيدة اللي فرحانة !!! ......

حاولت اتصنع الحزن ما عرفتش

من كتر الفرحة جريت جوة المطار ونسيت التفت اشاورلهم بايدي اودعهم ..

في الطيارة كانت الفرحة مش سايعاني .. المضيفين بيتكلموا عربي .. يا سلام يا ولاد .. يعيش العرب .. يحيى العرب !

نزلت حاسة اني بحضن مصر بعنيه .. ركبت العربية ووصلت لغزة .. غزة حلوت اوي .. يا سلااااااااااااام ...... الناس لابسة قماش كتير .. زيي !

لما وصلت اختي حضنتني وبتقولي : انتي خسيتي اوي ..
انا : ايوة يا خبيبي شوفت هصلي ايه هناك .. هاجات فزيئة خالس خالس .. انتوا وهشتوني اوي اوي !!!

اختي : ..... نعم يختي ؟؟!!

ــــــــــــــــــــــــــــ

مغامرات أخرى

المشروم
الرحلة

التعديل الأخير تم بواسطة مخبوطة ; 29-05-2010 الساعة 11:54 PM

الرقية الشرعية

اترك تعليقاً

لن يتم نشر عنوان بريدك الإلكتروني.